ನೈರ್ಮಲ್ಯವನ್ನು ಕಾಪಾಡಿಕೊಳ್ಳಲು ಮತ್ತು ರೋಗಗಳಿಂದ ದೂರವಿರಲು, ನಿಮ್ಮ ಹಲ್ಲುಗಳನ್ನು ಸ್ವಚ್ಛವಾಗಿ ಮತ್ತು ಅಚ್ಚುಕಟ್ಟಾಗಿ ಇರಿಸಿಕೊಳ್ಳಬೇಕು. ದಿನಕ್ಕೆ ಕನಿಷ್ಠ ಎರಡು ಬಾರಿ ಹಲ್ಲುಜ್ಜಬೇಕು. ಆದರೆ ಹಲ್ಲುಜ್ಜುವುದು ಎಂದರೆ ಮಕ್ಕಳಿಗೆ ಬಹಳ ಕಷ್ಟಕರವಾದ ಕೆಲಸ.
ಅನೇಕ ಪೋಷಕರಿಗೆ ಬೆಳಗ್ಗೆ ಹೊತ್ತು ಮಕ್ಕಳಿಗೆ ಹಲ್ಲುಜ್ಜಿಸುವುದು ಸವಾಲಿನ ಕೆಲಸವೇ ಆಗಿದೆ. ಆದ್ದರಿಂದ ಮಕ್ಕಳಿಗೆ ಹಲ್ಲುಜ್ಜುವ ಮಹತ್ವವನ್ನು ವಿವರಿಸುವುದು ಮತ್ತು ಹಲ್ಲುಜ್ಜಲು ಪ್ರೋತ್ಸಾಹಿಸುವುದು ಬಹಳ ಮುಖ್ಯ. ಎಷ್ಟೋ ಬಾರಿ ಹಠ ಮಾಡುವ ಮಕ್ಕಳಿಗೆ ಸುಲಭವಾಗಿ ಹಲ್ಲನ್ನು ಉಜ್ಜಿಸುವುದು ಹೇಗೆ ನಾವಿಂದು ತಿಳಿಯೋಣ.
ಮಕ್ಕಳಿಗೆ ತಮ್ಮ ಸ್ವಂತ ಬ್ರಷ್ ಮತ್ತು ಟೂತ್ಪೇಸ್ಟ್ ಆಯ್ಕೆ ಮಾಡುವ ಸ್ವಾತಂತ್ರ್ಯವನ್ನು ನೀಡಿ. ನೀವು ಮಾರುಕಟ್ಟೆಗೆ ಹೋದಾಗಲೆಲ್ಲಾ, ಅವರಿಗೆ ಇಷ್ಟವಾಗುವ ಡೆಂಟಲ್ ಕೇರ್ ಕಿಟ್ ಅನ್ನು ಅವರೇ ಖರೀದಿಸುವಂತೆ ಮನವೊಲಿಸಿ. ಇದರಿಂದ ಅವರು ತಮಗಿಷ್ಟವಾದ ಬ್ರಶ್ ಖರೀದಿಸುತ್ತಾರೆ ಮತ್ತು ಬಳಸುತ್ತಾರೆ. ಆದರೆ ನಿಮಗಿಷ್ಟವಾದ ಬ್ರಶ್ ಕೊಡಿಸಿದರೆ ಅವರಿಗೆ ಬೇಸರವಾಗಬಹುದು.
ಹಲ್ಲುಜ್ಜುವಾಗ ಜೋಕ್ ಮೋಜು ಮಾಡಲು ಪ್ರಯತ್ನಿಸಿ
ನೀವು ಅವರಿಗೆ ಬಲವಂತವಾಗಿ ಬ್ರಷ್ ಮಾಡಿಸಲು ಪ್ರಯತ್ನಿಸಿದರೆ, ಅದು ಅವರ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ. ಹಾಗಾಗಿ ನೀವು ಬ್ರಶ್ ಮಾಡಿಸುವಾಗ ಅವರ ನೆಚ್ಚಿನ ಹಾಡುಗಳನ್ನು ಹಾಡುತ್ತಾ ಬ್ರಶ್ ಮಾಡಿಸಿ. ಇಲ್ಲದಿದ್ದರೆ ಯೂಟ್ಯೂಬ್ನಲ್ಲಿ ಲಭ್ಯವಿರುವ ಹಾಡುಗಳನ್ನು ಕೂಡ ನೀವು ಪ್ಲೇ ಮಾಡಬಹುದು. ಒಂದು ವೇಳೆ ಕೋಪದಿಂದ ಬ್ರಶ್ ಮಾಡಿಸಲು ಪ್ರಯತ್ನಿದರೆ ಮಕ್ಕಳಿಗೆ ಹಲ್ಲುಜ್ಜಲು ಇಷ್ಟವಾಗುವುದಿಲ್ಲ ಎಂಬ ವಿಚಾರವನ್ನು ನೆನಪಿನಲ್ಲಿಟ್ಟುಕೊಳ್ಳಿ.
ನಿಮ್ಮ ಮಗುವಿನ ದಿನಚರಿಯಲ್ಲಿ ಹಲ್ಲುಜ್ಜಲು ಸಮಯವನ್ನು ನಿಗದಿಪಡಿಸಿ. ಇದರಿಂದ ಅವರಲ್ಲಿ ಬೆಳಗ್ಗೆ ಎದ್ದ ನಂತರ ಬ್ರಶ್ ಮಾಡುವುದು ಮೊದಲ ಕೆಲಸ ಮತ್ತು ಮಲಗುವ ಮುನ್ನ ಹಲ್ಲುಜ್ಜುವುದು ಅಗತ್ಯ ಎಂಬ ಭಾವನೆ ಮೂಡಿಸುತ್ತದೆ.
ಮಕ್ಕಳು ಚೆನ್ನಾಗಿ ಹಲ್ಲುಜ್ಜಲು ಪ್ರಾರಂಭಿಸಿದಾಗ, ಅವರಿಗೆ ಗಿಫ್ಟ್ ನೀಡುವುದನ್ನು ಮರೆಯಬೇಡಿ. ಹೀಗೆ ಮಾಡುವುದರಿಂದ ಅವರಿಗೆ ಏನೋ ಸಾಧನೆ ಮಾಡಿದ್ದೇವೆ ಎಂಬ ಭಾವನೆ ಮೂಡುತ್ತದೆ. ಬ್ರಶ್ ಮಾಡಲು ಅಥವಾ ಉತ್ತಮ ನೈರ್ಮಲ್ಯವನ್ನು ಕಾಪಾಡಿಕೊಳ್ಳಲು ಪ್ರೇರೇಪಿಸುತ್ತದೆ.
ದಂತ ವೈದ್ಯರ ಪ್ರಕಾರ, ಈ ಅಭ್ಯಾಸವನ್ನು ರೂಪಿಸಲು 21 ದಿನಗಳ ಕಾಲ ಬೇಕಾಗುತ್ತದೆ. ನೀವು 21 ದಿನಗಳವರೆಗೆ ಮಗುವಿಗೆ ಬ್ರಶ್ ಮಾಡಿಸಿದರೆ ಅದು ಉತ್ತಮ ಅಭ್ಯಾಸವಾಗುತ್ತದೆ. ಇಷ್ಟೇ ಅಲ್ಲ, ಪೋಷಕರು ಮಕ್ಕಳಿಗೆ ಮಾದರಿಯಾಗುತ್ತಾರೆ. ಇದರಿಂದ ಮಕ್ಕಳು ಪ್ರತಿದಿನ ತಮ್ಮ ಹಲ್ಲುಗಳನ್ನು ಉಜ್ಜುತ್ತಾರೆ ಮತ್ತು ಅದರ ಪ್ರಾಮುಖ್ಯತೆಯನ್ನು ಅರ್ಥಮಾಡಿಕೊಳ್ಳುತ್ತಾರೆ.