ಮೊಟ್ಟೆ ಸುಲಭವಾಗಿ, ಕಡಿಮೆ ಬೆಲೆಗೆ ಸಿಗುವ ಪೌಷ್ಠಿಕ ಆಹಾರಗಳಲ್ಲಿ ಒಂದು. ಮೊಟ್ಟೆಗಳನ್ನು ಸೂಪರ್ ಫುಡ್ ಎನ್ನಲಾಗುತ್ತೆ. ಇದು ನಮ್ಮ ಆರೋಗ್ಯಕ್ಕೆ ಎಷ್ಟು ಪ್ರಯೋಜನಕಾರಿಯೋ, ಚರ್ಮ ಮತ್ತು ಕೂದಲಿಗೆ ಅಷ್ಟೇ ಪ್ರಯೋಜನಕಾರಿಯಾಗಿದೆ. ಮೊಟ್ಟೆಯ ಜೊತೆಗೆ, ಅದರ ಸಿಪ್ಪೆಯಲ್ಲೂ ಅನೇಕ ಪೌಷ್ಠಿಕಾಂಶದ ಅಂಶಗಳಿವೆ.
ಹೌದು, ಮೊಟ್ಟೆಯ ಚಿಪ್ಪನ್ನು ಕಸ ಎಂದು ಪರಿಗಣಿಸಿ ಬಿಸಾಡುವ ಮುನ್ನ ಒಮ್ಮೆ ಅವುಗಳ ಉಪಯೋಗ ತಿಳಿಯಿರಿ. ಪ್ರೋಟೀನ್, ಕಬ್ಬಿಣ, ಅನೇಕ ಖನಿಜಗಳು ಮತ್ತು ವಿಟಮಿನ್ ಗಳಿಂದ ಸಮೃದ್ಧವಾಗಿರುವ ಮೊಟ್ಟೆಯ ಚಿಪ್ಪುಗಳು ಮನೆಯ ಅನೇಕ ಕೆಲಸಗಳಿಗೆ ನೆರವಾಗುತ್ತೆ. ಆ ಮೂಲಕ ಅನಗತ್ಯ ವೆಚ್ಚಗಳನ್ನು ಕಡಿಮೆ ಮಾಡಬಹುದು.
1) ಫೇಸ್ ಸ್ಕ್ರಬ್: ತ್ವಚೆಯ ಆರೈಕೆಯಲ್ಲಿ ನೀವು ಮೊಟ್ಟೆಯ ಚಿಪ್ಪುಗಳನ್ನು ಸಹ ಸೇರಿಸಿಕೊಳ್ಳಬಹುದು. ನಿಮ್ಮ ಮುಖದ ಹೊಳಪು ಮಾಯವಾಗಿದ್ದರೆ, ಮೊಟ್ಟೆಯ ಚಿಪ್ಪನ್ನು ಚೆನ್ನಾಗಿ ತೊಳೆದು ಒಣಗಿಸಿ ಪುಡಿ ಮಾಡಿ. ಈಗ ಅದಕ್ಕೆ ಜೇನುತುಪ್ಪ ಸೇರಿಸಿ ಮುಖಕ್ಕೆ ಸ್ಕ್ರಬ್ ಆಗಿ ಬಳಸಿ.
2) ಫೇಸ್ ಮಾಸ್ಕ್: ನೀವು ಇದನ್ನು ಫೇಸ್ ಮಾಸ್ಕ್ ಆಗಿಯೂ ಬಳಸಬಹುದು. ಇದಕ್ಕಾಗಿ ಮೊಟ್ಟೆಯ ಸಿಪ್ಪೆಯನ್ನು ರುಬ್ಬಿಕೊಂಡು ಅದಕ್ಕೆ ಮೊಸರು ಬೆರೆಸಿ ಮುಖಕ್ಕೆ ಹಚ್ಚಿಕೊಳ್ಳಿ.
3) ಹೇರ್ ಕೇರ್: ಕೂದಲ ರಕ್ಷಣೆಯಲ್ಲೂ ಮೊಟ್ಟೆಯ ಚಿಪ್ಪನ್ನು ಸುಲಭವಾಗಿ ಬಳಸಬಹುದು. ಇದಕ್ಕಾಗಿ ಮೊಟ್ಟೆಯ ಚಿಪ್ಪಿನ ಪುಡಿಯನ್ನು ಮೊಸರಿನಲ್ಲಿ ಬೆರೆಸಿ ಕೂದಲಿಗೆ ಚೆನ್ನಾಗಿ ಹಚ್ಚಿಕೊಳ್ಳಿ. 20 ನಿಮಿಷಗಳ ನಂತರ ತೊಳೆಯಿರಿ. ಕೂದಲ ಹೊಳಪು ಹೆಚ್ಚಾಗುತ್ತೆ.
4) ಬಿಳಿಯ ಹಲ್ಲುಗಳು: ಮೊಟ್ಟೆಯ ಚಿಪ್ಪುಗಳ ಸಹಾಯದಿಂದ, ನಿಮ್ಮ ಹಳದಿ ಹಲ್ಲುಗಳನ್ನು ಬಿಳಿಯಾಗಿಸಬಹುದು. ಒಂದು ಚಮಚ ಮೊಟ್ಟೆಯ ಚಿಪ್ಪಿನ ಪುಡಿಯಲ್ಲಿ ಒಂದು ಚಿಟಿಕೆ ಅಡಿಗೆ ಸೋಡಾವನ್ನು ಹಾಕಿ. ಈಗ ಅದಕ್ಕೆ ತೆಂಗಿನೆಣ್ಣೆ ಮಿಕ್ಸ್ ಮಾಡಿ ಪೇಸ್ಟ್ ಮಾಡಿಕೊಳ್ಳಿ. ಇದರಿಂದ ಹಲ್ಲುಜ್ಜಿದರೆ ಹಲ್ಲುಗಳ ಹೊಳಪು ಮರಳುತ್ತದೆ.
5) ಗೊಬ್ಬರ: 95% ಕ್ಯಾಲ್ಸಿಯಂ ಕಾರ್ಬೋನೇಟ್ ಮೊಟ್ಟೆಯ ಚಿಪ್ಪಿನಲ್ಲಿ ಕಂಡು ಬರುತ್ತದೆ. ನೀವು ಅದನ್ನು ನಿಮ್ಮ ಸಸ್ಯಗಳ ಬೇರುಗಳಲ್ಲಿ ಗೊಬ್ಬರವಾಗಿ ಬಳಸಬಹುದು. ಇದರಿಂದ ಸಸ್ಯಗಳು ವೇಗವಾಗಿ ಬೆಳೆಯುತ್ತವೆ. ಅಷ್ಟೇ ಅಲ್ಲ, ಗಿಡಗಳಲ್ಲಿ ಹೂವುಗಳು ಹೇರಳವಾಗಿ ಬರುತ್ತೆ.