ಬಾಗಲಕೋಟೆ: ನವನಗರ ಠಾಣೆ ವ್ಯಾಪ್ತಿ ರಾತ್ರಿ ಪಹರೆಯಲ್ಲಿ ಇದ್ದ ಪೊಲೀಸ್ ಕಾನ್ಸಟೇಬಲ್ ಗಳ ಸಮಯ ಪ್ರಜ್ಞೆಯಿಂದಾಗಿ ನವನಗರದಲ್ಲಿ ನಡೆಯಲಿದ್ದ ಭಾರಿ ದರೋಡೆಯೊಂದನ್ನು ತಪ್ಪಿಸಿದ್ದಲ್ಲದೇ, ಐವರು ಆರೋಪಿಗಳನ್ನು ಬಂಧಿಸಿ, ಅವರ ಬಳಿ ಇದ್ದ ಮಾರಕಾ ಸ್ತ್ರಗಳನ್ನು ವಶಪಡಿಸಿಕೊಳ್ಳುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ.
ನವನಗರದಲ್ಲಿ ಸಂಶಯಾಸ್ಪದ ರೀತಿಯಲ್ಲಿ ನಿಂತಿದ್ದ ಆರೋಪಿಗಳನ್ನು ಹಿಡಿದು ವಿಚಾರಿಸಿದಾಗ ಅವರ ಬಳಿ ಸಿಕ್ಕ ವಸ್ತುಗಳು ಭಯಾನಕವಾಗಿದ್ದವು. ಆರೋಪಿಗಳ ಬಳಿ ಒಂದು ತಲವಾರ್, ಒಂದು ಡ್ರ್ಯಾಗರ್, ಖಾರಪುಡಿ, ಹಗ್ಗ, ಕಲ್ಲು ಇದ್ದವು. ಖದೀಮರನ್ನು ಹೆಚ್ಚಿನ ವಿಚಾರಣೆ ಮಾಡಿದಾಗ ದರೋಡೆಗೆ ಹೊಂಚು ಹಾಕಿರುವುದನ್ನು ಬಾಯಿಬಿಟ್ಟಿದ್ದಾರೆ. ತಕ್ಷಣವೇ ಪೊಲೀಸ್ ಕಾನ್ಸಟೇಬಲ್ ಗಳು ಹಿರಿಯ ಅಧಿಕಾರಿಗಳಿಗೆ ಮಾಹಿತಿ ನೀಡಿ, ಅವರು ಸ್ಥಳಕ್ಕೆ ಆಗಮಿಸಿ ಐವರು ಆರೋಪಿಗಳನ್ನು ಬಂಧಿಸಿದ್ದಾರೆ.
ಆರೋಪಿಗಳ ಬಳಿ ಗೋವಾ ಪಾಸಿಂಗ್ ಬೈಕ್, ಮೊಬೈಲ್ ಗಳು ಸಹ ಪತ್ತೆ ಆಗಿವೆ. ಖದೀಮರು ರಾತ್ರಿ ಬಾಗಲಕೋಟೆ-ಸೀಮೆಕೇರಿ ಮಾರ್ಗದಲ್ಲಿ ಪ್ರಯಾಣಿಕರ ದರೋಡೆ ನಡೆಸಲು ಮುಂದಾಗಿದ್ದರು ಎನ್ನಲಾಗಿದೆ. ಆರೋಪಿತರಲ್ಲಿ ಒಬ್ಬ ಹಳೇ ಕೇಸ್ ನಲ್ಲಿ ಇದ್ದಾನೆ ಎಂದು ಪ್ರಾಥಮಿಕ ವಿಚಾರಣೆಯಲ್ಲಿ ತಿಳಿದು ಬಂದಿದೆ. ಒಬ್ಬ 24 ವಯಸ್ಸಿನವನು ಇದ್ದು, ಉಳಿದ ನಾಲ್ವರು ಸಹ 20 ವಯಸ್ಸಿನ ಆಸುಪಾಸಿನವರು. ಎಲ್ಲರೂ ಬಾಗಲಕೋಟೆಯವರು ಎಂದು ತಿಳಿದು ಬಂದಿದೆ. ಆರೋಪಿತರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ ಎಂದು ಎಸ್ಪಿ ಜಯಪ್ರಕಾಶ್ ತಿಳಿಸಿದ್ದಾರೆ.
ಹಾಗೆಯೇ ಬುಧವಾರ ರಾತ್ರಿ ನವನಗರ ಠಾಣೆ ವ್ಯಾಪ್ತಿಯಲ್ಲಿ ಕರ್ತವ್ಯದಲ್ಲಿ ಇದ್ದ ಪೊಲೀಸ್ ಕಾನ್ಸಟೇಬಲ್ ಗಳಾದ ಬಸವರಾಜ್ ನಾಲತವಾಡ ಹಾಗೂ ಪ್ರಕಾಶ್ ರಾಠೋಡ ಎನ್ನುವವರು ತಮ್ಮ ಸಮಯ ಪ್ರಜ್ಞೆ ಮೆರೆದಿದ್ದರಿಂದ ನಗರದಲ್ಲಿ ನಡೆಯಲಿದ್ದ ದರೋಡೆಯನ್ನು ತಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.