ಶೂಗಳು ಮತ್ತು ಪಾದರಕ್ಷೆಗಳು ಆರೋಗ್ಯ ಮತ್ತು ಫಿಟ್ನೆಸ್ಗೆ ಸಹಾಯಕವಾಗಿವೆ. ನಾವು ನಮ್ಮ ಜೀವಿತಾವಧಿಯಲ್ಲಿ ತುಂಬಾ ನಡೆಯುತ್ತೇವೆ. ಆದರೆ ನಮ್ಮ ಪಾದಗಳಿಗೆ ರಕ್ಷಣೆ ನೀಡುವ ಪಾದರಕ್ಷೆಗಳ ಬಗ್ಗೆ ನಾವು ಗಮನ ಹರಿಸುವುದು ತೀರಾ ಕಡಿಮೆ.
ನಮ್ಮಲ್ಲಿ ಹೆಚ್ಚಿನವರು ವಾಕಿಂಗ್, ಜಾಗಿಂಗ್, ಓಟ, ಜಿಮ್ ಚಟುವಟಿಕೆಗಳಿಗೆ ಹೀಗೆ ಎಲ್ಲಾ ಉದ್ದೇಶಗಳನ್ನು ಪೂರೈಸಲು ಒಂದೇ ಜೋಡಿ ಶೂಗಳನ್ನು ಉಪಯೋಗಿಸುತ್ತಾರೆ, ಆದರೆ ಕ್ರೀಡಾ ಬಯೋಮೆಕಾನಿಕ್ಸ್ ಪ್ರಕಾರ ಇವೆಲ್ಲಾ ಚಟುವಟಿಕೆಗಳಿಗೆ ಬೇರೆ ಬೇರೆ ರೀತಿಯ ಶೂಗಳನ್ನು ನಾವು ಧರಿಸಬೇಕಾಗುತ್ತದೆ.
ಸರಿಯಾದ ವಾಕಿಂಗ್ ಶೂಗಳು ಸರಿಯಾದ ವಾಕಿಂಗ್ ತಂತ್ರವನ್ನು ನಿರ್ವಹಿಸುವಲ್ಲಿ ಪರಿಣಾಮ ಬೀರುತ್ತದೆ, ಜೊತೆಗೆ ಗಾಯವಾಗುವುದನ್ನು ತಡೆಗಟ್ಟುತ್ತವೆ. ಇದು ಪಾದದ ಸರಿಯಾದ ಬಯೋಮೆಕಾನಿಕ್ಸ್ ನ್ನು ನಿರ್ವಹಿಸುತ್ತದೆ ಮತ್ತು ನಡೆಯುವಾಗ ಪಾದಕ್ಕೆ ಸಂಪರ್ಕಗೊಂಡಿರುವ ಎಲ್ಲಾ ಇತರ ಕೀಲುಗಳಿಗೆ ತೊಂದರೆ ಆಗದ ಹಾಗೆ ನೋಡಿಕೊಳ್ಳುತ್ತದೆ.
ಮಸ್ಕ್ಯುಲೋಸ್ಕೆಲಿಟಲ್ ಸಮಸ್ಯೆಗಳಿಂದ ಬರುವ ಬೆನ್ನು ನೋವು, ಮೊಣಕಾಲು ನೋವು, ಕಾಲು ನೋವು, ವಾಸ್ತವವಾಗಿ ಕುತ್ತಿಗೆ ನೋವು ಮತ್ತು ತಲೆನೋವು ಇತ್ಯಾದಿ ಬರಲು ಹಲವು ಸಂದರ್ಭಗಳಲ್ಲಿ ಸರಿಯಾದ ಶೂ ಮತ್ತು ಪಾದರಕ್ಷೆ ಧರಿಸದಿರುವುದೇ ಕಾರಣವಾಗಿದೆ.
ಸರಿಯಾದ ಶೂಗಳನ್ನು ಆಯ್ಕೆ ಮಾಡುವಾಗ ಈ ಅಂಶಗಳನ್ನು ಪರಿಗಣಿಸುವುದು ಮುಖ್ಯ
*ಸ್ಥಿರತೆ: ನಡೆಯುವಾಗ ಉತ್ತಮ ಸ್ಥಿರತೆ ಮತ್ತು ಕಾಲಿಗೆ ಮೆತ್ತಗೆ ಎನಿಸಿಕೊಳ್ಳಬೇಕು.
*ಹೊಂದಿಕೊಳ್ಳುವಿಕೆ: ಶೂಗಳು ಸುಲಭವಾದ ಪುಶ್-ಆಫ್ ಹಂತವನ್ನು ಒದಗಿಸಬೇಕು
*ಆರಾಮದಾಯಕ: ಶೂ ಸಮರ್ಪಕವಾಗಿ ಹೊಂದಿಕೆಯಾಗಬೇಕು, ವಿಶೇಷವಾಗಿ ಹಿಮ್ಮಡಿ ಮತ್ತು ಮಧ್ಯ ಪಾದದ ಸುತ್ತಲೂ ಟೋ-ಆಫ್ ಮಾಡಲು ಸ್ವಲ್ಪ ಸ್ಥಳಾವಕಾಶವಿರಬೇಕು.
ಹೈ ಹೀಲ್ಸ್ ಪಾದರಕ್ಷೆ ಧರಿಸುವುದರಿಂದ ಬೆನ್ನು ನೋವು, ತಲೆನೋವು, ಪಾದದ ಗಾಯಗಳು, ಉಳುಕು ಬರುವ ಸಾಧ್ಯತೆಗಳಿರುತ್ತವೆ.
ಸರಿಯಾದ ಶೂಗಳನ್ನು ಆಯ್ಕೆ ಮಾಡುವುದು ಹೇಗೆ?
ನಿಯಮಿತವಾಗಿ ಧರಿಸುವ ಸಾಕ್ಸ್ಗಳ ಪ್ರಕಾರದ ಬೂಟುಗಳನ್ನು ತೆಗೆದುಕೊಳ್ಳಬೇಕು. ಇ-ಕಾಮ್ ವೇಗವಾಗಿ ಬೆಳೆಯುತ್ತಿರುವುದರಿಂದ, ಟ್ರೆಂಡಿಯರ್ ಆಗಿ ಕಾಣಲು ಅಗ್ಗದ ಶೂಗಳನ್ನು ಆಯ್ಕೆ ಮಾಡಿಕೊಳ್ಳಬಾರದು. ಪಾದಗಳ ವಿಷಯಕ್ಕೆ ಬಂದಾಗ, ಶೂಗಳ ಸಂಖ್ಯೆಗಿಂತ ಶೂಗಳ ಗುಣಮಟ್ಟವು ಹೆಚ್ಚು ಮುಖ್ಯವಾಗಿದೆ.
ಬೂಟುಗಳನ್ನು ಖರೀದಿಸುವಾಗ, ನಿಂತುಕೊಂಡು ನಿಮ್ಮ ಪಾದಗಳ ಅಳತೆಯನ್ನು ಪರಿಶೀಲಿಸಿ, ಏಕೆಂದರೆ, ನಿಮ್ಮ ಪಾದವು ಈ ಸ್ಥಿತಿಯಲ್ಲಿ ಗರಿಷ್ಠ ಹಿಗ್ಗುವಿಕೆಗೆ ಹೋಗುತ್ತದೆ. ನಿಮ್ಮ ಪಾದವನ್ನು ಮೇಲಕ್ಕೆ/ಕೆಳಗೆ, ಒಳಗೆ ಮತ್ತು ಹೊರಗೆ ಚಲಿಸಿದಾಗ, ಶೂ ಹೊರಗೆ ಬರಬಾರದು. ನಿಮ್ಮ ಬೆರಳನ್ನು ಮೇಲಕ್ಕೆ ಮತ್ತು ಕೆಳಕ್ಕೆ ಚಲಿಸಲು ನಿಮಗೆ ಸಾಧ್ಯವಾಗಬೇಕು. ಸಾಕಷ್ಟು ಹೆಚ್ಚು ದೂರ ಆರಾಮವಾಗಿ ನಡೆಯಲು ಸಹಾಯ ಮಾಡುವಂತಹದನ್ನು ತೆಗೆದುಕೊಳ್ಳಬೇಕು.