ಬೆಂಗಳೂರು: ರಾಜ್ಯದಲ್ಲಿ ಸಾರ್ವತ್ರಿಕ ಚುನಾವಣೆಗೆ ಇನ್ನೇನು ಕೆಲವೇ ದಿನ ಉಳಿದಿದ್ದು, ರಾಜಕೀಯ ಕಲಿಗಳು ಅಬ್ಬರದ ಪ್ರಚಾರ ಕೈಗೊಂಡಿದ್ದಾರೆ.
ರಾಷ್ಟ್ರೀಯ ಪಕ್ಷಗಳು ತಮ್ಮ ರಾಜ್ಯ ಹಾಗೂ ಕೇಂದ್ರ ನಾಯಕರ ಸಾಧನೆ ಹಾಗೂ ಅವರನ್ನು ಸ್ಟಾರ್ ಪ್ರಚಾರಕರಾಗಿ ಕರೆಯಿಸಿ ತಮ್ಮ ಮತ ಬೇಟೆಯಲ್ಲಿ ತೊಡಗಿದ್ದಾರೆ. ಇನ್ನು ಪ್ರಾದೇಶಿಕ ಪಕ್ಷಗಳು ರಾಷ್ಟ್ರೀಯ ಪಕ್ಷಗಳ ನ್ಯೂನ್ಯತೆಯನ್ನು ಎತ್ತಿ ಹಿಡಿದು ಮತದಾರನನ್ನು ಸೆಳೆಯುತ್ತಿದ್ದಾರೆ.
ಇವೆಲ್ಲದರ ಮಧ್ಯದಲ್ಲಿ ಪಕ್ಷದಿಂದ ಟಿಕೆಟ್ ಕೈತಪ್ಪಿ ಅಥವಾ ಯಾವ ಪಕ್ಷದಲ್ಲೂ ಗುರುತಿಸಿಕೊಳ್ಳದೇ ಪಕ್ಷೇತರ ಅಭ್ಯರ್ಥಿಗಳ ಚುನಾವಣಾ ಪ್ರಚಾರ ನಿಜಕ್ಕೂ ಸವಾಲಿನದ್ದಾಗಿರುತ್ತದೆ.
ಪಕ್ಷೇತರ ಅಭ್ಯರ್ಥಿಗಳಿಗೆ ಯಾವುದೇ ಹಿರಿಯ ನಾಯಕರ ಬೆಂಬಲ ಇರುವುದಿಲ್ಲ. ಬೂತ್ ಮಟ್ಟದಲ್ಲಿ ಪ್ರಚಾರ ಮಾಡಲು ಕಾರ್ಯಕರ್ತರು ಇಲ್ಲದೇ ಚುನಾವಣೆಯಲ್ಲಿ ಗೆಲ್ಲೋದು ಅಷ್ಟು ಸುಲಭದ ಮಾತಲ್ಲ.
ಹಾಗಂತ ಕರ್ನಾಟಕ ರಾಜಕೀಯ ಇತಿಹಾಸದಲ್ಲಿ ಪಕ್ಷೇತರರು ಸೋತಿದ್ದಾರೆ ಅಂತಲ್ಲ, ಎಷ್ಟೋ ಸಂದರ್ಭದಲ್ಲಿ ಅವರು ಸರ್ಕಾರ ರಚಿಸುವಲ್ಲಿ ನಿರ್ಣಾಯಕ ಪಾತ್ರವಹಿಸಿದ್ದಾರೆ.
ಇನ್ನು ಈ ಸಲದ ಚುನಾವಣೆಯಲ್ಲಿ ಸಾಕಷ್ಟು ಜನ ಅಭ್ಯರ್ಥಿಗಳು ಟಿಕೆಟ್ ಸಿಗದೇ ಪಕ್ಷದಿಂದ ಹೊರಬಂದು ಪಕ್ಷೇತರರಾಗಿ ಸ್ಪರ್ಧಿಸುತ್ತಿದ್ದಾರೆ. ಇಂತಹ ಸಂದರ್ಭದಲ್ಲಿ ಮತದಾರರನ್ನು ಸೆಳೆಯಲು ವಿಭಿನ್ನವಾದ ಹಾಗೂ ಆಕರ್ಷಕವಾದ ಚಿನ್ಹೆಯನ್ನು ಹೊಂದಿದ್ದಾರೆ. ಚುನಾವಣಾ ಆಯೋಗವು ಕೂಡ ಪಕ್ಷೇತರರಿಗೆ ಹಾಸ್ಯಮಯ ಹಾಗೂ ಅಷ್ಟೇ ಆಕರ್ಷಕವಾದ ಚಿಹ್ನೆಗಳನ್ನು ನೀಡಿದೆ.
ಕಾರ್ಕಳದಲ್ಲಿ ಬಿಜೆಪಿ ಟಿಕೆಟ್ ಆಕಾಂಕ್ಷಿಯಾಗಿದ್ದ ಶ್ರೀರಾಮ ಸೇನೆ ಮುಖಂಡ ಪ್ರಮೋದ್ ಮುತಾಲಿಕ್ ಅವರು ಪಕ್ಷದಿಂದ ಟಿಕೆಟ್ ಸಿಗದೇ ಇದ್ದು ಪಕ್ಷೇತರ ಅಭ್ಯರ್ಥಿಯಾಗಿದ್ದಾರೆ. ಅವರಿಗೆ ಚುನಾವಣಾ ಆಯೋಗ ರಣ ಕಹಳೆಯ ಚಿಹ್ನೆಯನ್ನು ನೀಡಿದೆ. ಇದನ್ನೇ ಬಳಸಿಕೊಂಡು ಮುತಾಲಿಕ್ ಇದು ಹಿಂದೂ ಸಾಮ್ರಾಜ್ಯದ ರಣ ಕಹಳೆ ಎಂದೆಲ್ಲ ಪ್ರಚಾರದಲ್ಲಿ ಬಳಸಿಕೊಂಡಿದ್ದಾರೆ.
ಇನ್ನು ಪುತ್ತೂರಿನಲ್ಲಿ ಅರುಣ ಪುತ್ತಿಲಗೆ ಬ್ಯಾಟ್ ಚಿಹ್ನೆ ದೊರೆತದ್ದು, ಅವರ ಬೆಂಬಲಿಗರು ಕ್ರಿಕೆಟ್ ಆಟಗಾರ ಸಚಿನ್ ತೆಂಡೂಲ್ಕರ್ ಫೋಟೋ ಬಳಸಿಕೊಂಡು ಟಾಸ್ ಗೆದ್ದಾಗಿದೆ ಇನ್ನು ಗೆಲುವು ನಮ್ಮದೇ, ಪುತ್ತಿಲ ಫಾರ್ ಪುತ್ತೂರು ಎಂದೆಲ್ಲ ಚುಟುಕು ಬರಹಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡುತ್ತಿದ್ದಾರೆ.
ಅಣ್ಣ-ತಮ್ಮನ ನಡುವಿನ ತೀವ್ರ ಸ್ಪರ್ಧೆಯ ತಾಣವಾಗಿರುವ ಬಾಗಲಕೋಟೆ ಮತಕ್ಷೇತ್ರದಲ್ಲಿ ಹೋದ ಸಾರಿ 500 ಮತಗಳನ್ನು ಪಡೆದ ಪಕ್ಷೇತರ ಅಭ್ಯರ್ಥಿ ನಾಗರಾಜ್ ಕಲ್ಬುಟಕರ್ ಅವರಿಗೆ ಚುನಾವಣಾ ಆಯೋಗ ಚಪ್ಪಲಿಯ ಚಿಹ್ನೆಯನ್ನು ನೀಡಿದೆ. ಅವರು ಪಾದಗಳ ರಕ್ಷಣೆಗಾಗಿ ಪಾದರಕ್ಷೆ ಹಾಗೇ ನಿಮ್ಮ ರಕ್ಷಣೆಗಾಗಿ ನಾನು ಎಂದೂ ಪ್ರಚಾರ ಮಾಡುತ್ತಿದ್ದಾರೆ. ಇದು ಹಾಸ್ಯಮಯವಾದರೂ ಜನರಲ್ಲಿ ಸಾಕಷ್ಟು ಪರಿಣಾಮವನ್ನು ಬೀರಬಹುದು.
ಇನ್ನೂ ಬಾಗಲಕೋಟೆಯ ಮತ್ತೊಬ್ಬ ಪಕ್ಷೇತರ ಹಾಗೂ ನಿರ್ಣಾಯಕ ಅಭ್ಯರ್ಥಿ ಮಲ್ಲಿಕಾರ್ಜುನ ಚರಂತಿಮಠ ಅವರಿಗೆ ಆಟೋ ಚಿಹ್ನೆ ದೊರೆತಿದ್ದು ಈ ಚಿಹ್ನೆ ಬಳಸಿಕೊಂಡು ಅವರು ಮೇ ಹತ್ತಕ್ಕೆ ಆಟೋ ಹತ್ತು ಎಂಬೆಲ್ಲ ಪ್ರಚಾರ ಕೈಗೊಂಡಿದ್ದಾರೆ.
ಇಷ್ಟೆಲ್ಲ ಸರ್ಕಸ್ ನಡುವೆಯೂ ವಿಜಯಲಕ್ಷ್ಮೀ ಯಾರಿಗೆ ಒಲಿಯಲಿದ್ದಾಳೆ, ಮತದಾರ ಪ್ರಭುವಿನ ಇಂಗಿತ ಏನು ಎಂದು ಕಾಲವೇ ನಿರ್ಧರಿಸಬೇಕಿದೆ